Pas humbjes ndaj Shtutgartit, Juventusi rikthehet në Ligën e Kampioneve për t’u përballur me Lilën e Edon Zhegrovës.
Në sfidën që luhet sot në orën 21:00 në fushën e francezëve, Juventusi kërkon të rikthehet te fitorja, edhe pse javët e para të Champions-it e kanë nxjerrë Lilën si një skuadër të fortë, sidomos pas fitoreve ndaj Atletiko Madridit dhe Real Madridit.
Një nga lojtarët që do të përballet Juventusi sot është edhe Edon Zhegrova. Talenti i përfaqësueses së Kosovës është duke kaluar një formë fantastike dhe këtë gjë kërkon që ta tregojë edhe ndaj Juventusit. Xhuntoli do ta monitorojë nga afër Zhegrovën, të cilin e ka kërkuar edhe gjatë merkatos së verës. Bashkë me Edon Zhegrovën në listën e “Zonjës” është edhe sulmuesi Dejvid, i cili i pëlqen shumë Xhuntolit.
Për këtë arsye një paraqitje edhe më e mirë ndaj Juves, mund të bindte më shumë drejtuesit bardhezi për të afruar Zhegrovën në Torino. Sakaq, në prag të kësaj sfide ka dhënë konferencën për shtyp edhe trajneri Tiago Mota. “E respektojmë shumë Lilën. Është një skuadër që po kalon një formë të mirë. Objektivi ynë megjithatë është që të fitojmë ndeshjen. Duhet të rritemi dhe të gjejmë vazhdimësinë”, u shpreh fillimisht Tiago Mota.
RIKTHIMET- “Rikthehet Duglas Luiz. Është një lojtar që mund të na ndihmojë shumë, si nga fillimi i ndeshjes, ashtu edhe nëse futet si zëvendësues. Jemi të lumtur që e kemi. Do të mungojnë vetëm Milik, Bremer dhe Niko Gonzalez. Të tjerët janë mirë”.
VLAHOVIÇ- “Dushani është mirë dhe po punon mirë që nga starti i këtij sezoni. Tani duhet të bëjë diçka më shumë për të ndihmuar skuadrën. Kemi shumë besim tek ai. Sot do të shkojmë në fushë për të bërë një paraqitje të madhe.”
LILË– “Nuk më kanë bërë çudi rezultatet e mëparshme. Ata luajnë shumë mirë si skuadër. Në mbrojtje janë shumë solidë. Nuk jam i befasuar nga rezultatet që kanë arritur, e njoh mjaft mirë nivelin e trajnerit. Do të jetë një kundërshtar shumë interesant për t’u përballur. Duhet të jemi të përqendruar për të bërë një ndeshje të madhe”.
FAVORITI- “Nuk ka favoritë në këtë përballje. Do të jetë një ndeshje të bukur, në një stadium të bukur dhe shpresojmë të futemi në fushë me kushtet e duhura. Do të flasim pas ndeshjes se kush ishte favoriti”.
RËNDËSIA- “Të gjitha ndeshjet janë të rëndësishme. Ne si Juventus duam të fitojmë gjithmonë. Gjëja më e rëndësishme është të kërkojmë më të mirën e mundshme. Lilë ka shumë besim te vetja dhe ne duhet të luajmë në kushtet tona optimale. Duhet të japim diçka më tepër se zakonisht. Gjithmonë ka vend për përmirësim dhe duhet të futemi në fushë të përkushtuar për këtë gjë”, tha ndër të tjera Tiago Mota.
PANORAMASPORT.AL
