Pretendimi i Izraelit se ka vrarë liderin e Hamasit, Yahya Sinwar, ka ndezur një stuhi komentesh, por ndërsa zyrtarët perëndimorë shpresojnë se eliminimi i tij në një sulm izraelit të mërkurën do t’i hapë derën paqes, shumë analistë pranojnë se nuk do të ndryshojë shumë për këtë çështje.
Disa, nga ana tjetër, pohojnë se likuidimi i Sinwar do të homogjenizojë më tej forcat e rezistencës, të cilat do të vazhdojnë të luftojnë me të njëjtin intensitet.
Phyllis Bennis, një bashkëpunëtore në Institutin për Studime Politike dhe këshilltare ndërkombëtare e Zërit Çifut për Paqe, i tha Al Jazeera-s se vrasja e liderit të Hamasit, Yahya Sinwar nuk do të çojë në një armëpushim në Gaza.
“Gjatë gjithë kohës ka pasur një rrugë për një armëpushim dhe ajo duhet të fillojë me përfundimin e furnizimit me armë që lejojnë luftën që të vazhdojë lufta nga SHBA-ja”, tha Bennis për Al Jazeera-n.
“Lëvizja e rezistencës i ka rrënjët në popull”
“Unë nuk mendoj se do të ketë ndonjë ndryshim nëse Blinken shkon në rajon ose nëse Biden telefonon Netanyahun. Asnjë nga këto nuk ka vërtet rëndësi. Fjalët e tyre nuk kanë rëndësi nëse veprimet e tyre nuk ndryshojnë dhe SHBA vazhdojnë t’i dërgojnë Izraelit të gjitha armët që i nevojiten për të vazhduar këtë luftë dhe gjenocid,” argumentoi Bennis.
“Nuk ka asnjë arsye për të parë vdekjen e një lideri tjetër të Hamasit – këtë herë Yahya Sinwar – si një ndryshim. Lufta është kundër gjithë popullatës së Gazës, jo kundër një njeriu”, tha ajo.
Daniel Levy, president i Projektit të SHBA/Lindjes së Mesme dhe ish-këshilltar i qeverisë izraelite, tha se vrasja e Sinwar nuk do t’i japë fund rezistencës palestineze ndaj shtypjes izraelite.
“Presidenti amerikan tha se kjo është ‘si Osama bin Laden’. Ju vrisni një terrorist dhe kjo është për fat të mirë. Por kjo është një lëvizje rezistence e rrënjosur në popull, sepse populli i saj është i shtypur dhe i mohuar në të drejtat e tij”, tha Levy për Al Jazeera-n.
“Do të vazhdojë. Njerëzit do ta shikojnë këtë dhe do të shohin dikë që është martir, që i jep më shumë shkëlqim çështjes palestineze”, shtoi ai.
Ai nënvizoi se Netanyahu “u mbështet në këtë ide se rajoni i Lindjes së Mesme tani mund të dalë nga errësira”.
“Sikur errësira të mos jetë shkatërrimi i shkollave, spitaleve, 40,000 jetëve, tokës së djegur, Gazës, Bregut Perëndimor, Bejrutit – shkaktuar nga Izraeli”, tha Levy. /tesheshi.com/
