Prokurorët në Argjentinë kanë vënë nën akuzë tre persona në lidhje me vdekjen e ish-këngëtarit të One Direction, Liam Payne, njoftuan zyrtarët të enjten.
Payne, 31 vjeç, vdiq më 16 tetor kur ra nga ballkoni i hotelit “Casa Sur Palermo” në Buenos Aires.
Një person, për të cilin autoritetet thonë se kalonte kohë me Payne çdo ditë gjatë qëndrimit të tij në Buenos Aires, po përballet me akuzën për “braktisjen e një personi që përfundoi tragjikisht,” që parashikon një dënim nga pesë deri në 15 vjet burg, sipas një njoftimi për shtyp nga Prokuroria Kombëtare Penale e Argjentinës.
Dy të akuzuarit e tjerë dyshohet se kanë furnizuar Payne me drogë, përfshirë kokainë dhe po përballen secili me dy vepra të furnizimit me lëndë narkotike. Zyrtarët nuk specifikuan dënimin për këto akuza.
Një nga të akuzuarit për furnizimin me lëndë narkotike ishte punonjës i hotelit, bën me dije prokuroria.
Tre personat janë njoftuar për akuzat dhe u është ndaluar largimi nga vendi. Asnjë nga të dyshuarit nuk është identifikuar me emër.
Në njoftim thuhet gjithashtu se Payne “nuk ishte plotësisht i vetëdijshëm ose po përjetonte një gjendje humbjeje të dukshme të vetëdijes” në momentin e rënies.
“Sipas prokurorisë, kjo situatë përjashton mundësinë e një veprimi të vetëdijshëm apo të qëllimshëm nga ana e viktimës”, thuhet në deklaratë.
Hetimi përfshiu dhjetëra intervista me stafin e hotelit, familjen dhe miqtë e Payne, si dhe ekspertë në fushat e mjekësisë, biokimisë dhe psikiatrisë. Hetuesit shqyrtuan më shumë se 800 orë pamje filmike nga hoteli dhe rrugët publike dhe analizuan celularin e Payne për të verifikuar gjurmët e tij digjitale në periudhën para vdekjes së tij.
Autopsia gjithashtu u krye. Pas kësaj, trupi i Payne iu kthye babait të tij, Geoff Payne, i cili kishte ardhur në Argjentinë një ditë pas vdekjes së djalit të tij.
Testet toksikologjike të kryera gjatë autopsisë treguan se Payne kishte vetëm “gjurmë” të drogës në sistemin e tij. U zbuluan “gjurmë” alkooli, kokaine dhe një antidepresanti me recetë, sipas prokurorisë. Ekspertët mjekësorë konfirmuan se Payne kishte pësuar vetëm lëndime nga rënia.
Të gjitha të dhënat e mbledhura nga hetuesit janë përfshirë në një raport prej 180 faqesh, i cili i është paraqitur gjyqtares Laura Bruniard, e cila mbikëqyr çështjet penale. Bruniard ka miratuar akuzat ndaj tre personave, por hetimi do të vazhdojë, pasi hetuesit përpiqen të analizojnë pajisje të tjera personale të Payne.
