Ushtria iraniane ka publikuar një mesazh të ri për Izraelin, ndërkohë që bota po pret me ankth përgjigjen e Iranit ndaj sulmit të forcave izraelite në territorin iranian dhjetë ditë më parë.
Mesazhi i fundit, i cili u postua në kanalin e rrjetit social X të ushtrisë iraniane, ishte shkruar në hebraisht, duke sugjeruar se i drejtohej izraelitëve.
Mesazhi thotë: “Nuk ka kohë për të takuar Zotin”, gjë që ngre më tej tensionet në një situatë tashmë të tensionuar.
Kujtojmë se kërcënimet iraniane për hakmarrje pasuan një sulm ajror izraelit më 26 tetor, i cili kishte në shënjestër sistemet iraniane anti-ajrore dhe stacionet e radarëve. Ky sulm ishte një përgjigje ndaj një sulmi me raketa balistike iraniane në territoret izraelite në fillim të tetorit.
Irani konfirmoi se katër ushtarë iranianë u vranë në sulm, por pretendoi se dëmet e shkaktuara nga sulmet izraelite ishin minimale dhe se forcat iraniane të mbrojtjes ajrore ishin në gjendje të neutralizonin shumicën e kërcënimeve.
Nga ana tjetër, Izraeli pretendon se operacioni ishte i suksesshëm dhe se shkatërroi një pjesë të madhe të mbrojtjes ajrore të Iranit, si dhe kapacitetin e prodhimit të raketave balistike, gjë që e ndërlikon më tej situatën mes dy vendeve. /tesheshi.com/
