STAMBOLL, 24 tetor /ATSH/- Qeveria turke tha se ushtria e saj kishte goditur dje në mbremje disa vende në Irak dhe Siri të lidhura me grupin militant kurd PKK – pasi e fajësoi atë për një sulm pranë Ankarasë që shkaktoi vdekjen e të paktën pesë persona, sipas BBc.
Video të ndryshme nga sulmi i djeshëm tregojnë të paktën dy persona që gjuajnë me armë rreth hyrjes së Industrisë Turke të Hapësirës Ajrore (TAI), e cila ndodhet rreth 40 kilometra jashtë kryeqytetit.
Asnjë grup nuk ka marrë përgjegjësinë për sulmin, në të cilin u plagosën 22 persona.
“Gjithsej 32 objektiva që i përkisnin terroristëve u shkatërruan me sukses – në sulmin hakmarrës”, tha në një deklaratë Ministria turke e Mbrojtjes.
Presidenti Recep Tayyip Erdogan e quajti sulmin ndaj TAI “të neveritshëm” në një postim në X.
Ministri i Brendshëm Ali Yerlikaya tha se dy sulmues, një grua dhe një burrë, ishin “neutralizuar”, duke shtuar se sulmi ka shumë të ngjarë të kishte përfshirë PKK.
Partia e Punëtorëve të Kurdistanit (PKK) është e ndaluar si një organizatë terroriste në Turqi, SHBA dhe MB, dhe ka luftuar kundër shtetit turk që nga vitet 1980 për të drejta më të mëdha për pakicën e rëndësishme kurde të vendit.
Forcat Demokratike Siriane të udhëhequra nga kurdët thanë sot në mëngjes se Turqia që atëherë kishte nisur një “valë të re” sulmesh, duke përfshirë “mbledhjet civile” dhe duke vrarë 12 persona.
Ministria turke e Mbrojtjes tha më herët se të gjitha llojet e masave paraprake ishin marrë për të parandaluar dëmtimin e civilëve të pafajshëm, elementëve miqësorë, pasurive historike dhe kulturore dhe mjedisit. //a.i/
