TEL AVIV, 23 tetor /ATSH-DPA/- Sekretari amerikan i Shtetit, Antony Blinken ka hedhur poshtë raportet për një pushtim të mundshëm të përhershëm të Rripit verior të Gazës nga Izraeli.
Ai u tha sot gazetarëve në Tel Aviv, para nisjes së tij në kryeqytetin saudit, Riad se qeveria izraelite nuk po ndiqte plane të tilla.
“Kjo është ajo që kam dëgjuar nga kryeministri Benjamin Netanyahu, i cili është fjala autoritative për këtë”, tha Blinken.
“Ne refuzojmë çdo ripushtim izraelit të Gazës… Ka qenë politika e SHBA-së dhe do të mbetet politika e SHBA-së”, tha ai.
Grupet izraelite të të drejtave të njeriut paralajmëruan javën e kaluar se ka indikacione se ushtria izraelite po fillon në heshtje të zbatojë atë që njihet si “Plani i Gjeneralëve”.
Ata thonë se plani supozohet se është hartuar nga oficerët në pension dhe ish-këshilltarja izraelite e sigurisë, Giora Eiland.
Thuhet se ai përfshin zhvendosjen e detyruar të popullsisë civile përmes shtrëngimit të rrethimit të Rripit verior të Gazës dhe vuajtjes së popullsisë nga uria.
As ushtria dhe as zyra e Netanyahut nuk e kanë komentuar këtë.
“Pra, çfarëdo që të thonë, qofshin gjeneralë në pension apo disa anëtarë të qeverisë, kjo nuk është politika e qeverisë dhe sigurisht nuk është politika e SHBA-së. Ne e refuzojmë atë”, shtoi Blinken.
Megjithatë, ai pranoi se disa anëtarë të qeverisë së ekstremit të djathtë në Izrael po kërkojnë një ripushtim të brezit bregdetar, nga i cili ushtria u tërhoq në 2005. Vendbanimet izraelite u evakuuan me forcë në atë kohë.
Blinken ka planifikuar takime të tjera sot në mbrëmje në Riad, duke përfshirë një diskutim me homologun e tij./ /a.i/
