STAMBOLL, 28 tetor /ATSH-DPA/- Forcat turke sulmuan sot pozicionet e Partisë së Punëtorëve të Kurdistanit (PKK) në Siri dhe Irak – për të pestën ditë radhazi pas një sulmi të PKK-së ndaj një kompanie armatimesh në Ankara.
Ministria turke e Mbrojtjes tha në një postim në X se sulme ishin kryer në pozicionet e PKK-së në Irakun verior dhe në veri të Sirisë ndaj milicisë kurde YPG, të cilën Turqia e sheh si aleate të PKK-së.
Observatori Sirian për të Drejtat e Njeriut (SOHR) dhe aktivistët kurdë konfirmuan sulmet në veri të Sirisë, duke thënë se ata kishin shënjestruar infrastrukturën rreth Al-Hasakah.
“Sulmet shkatërruan kapanone gruri, një fabrikë qumështi dhe një fabrikë për prodhimin e djathit. Impiantet e prodhimit të ujit, gazit dhe energjisë elektrike u sulmuan gjithashtu”, thanë ata.
Ministria turke e Mbrojtjes pretendon se 23 terroristë ishin eliminuar në Irak dhe 14 të tjerë në Siri. SOHR, në të kundërt raportoi se të paktën 17 civilë ishin vrarë që nga e mërkura.
Të mërkurën, pesë persona u vranë në sulmin në Ankara, së bashku me dy sulmues. PKK ka marrë përgjegjësinë.
PKK, e ndaluar si organizatë terroriste në Turqi, Bashkimin Evropian dhe Shtetet e Bashkuara të Amerikës, ka luftuar kundër shtetit turk që nga vitet 1980. Selia e saj shtrihet në malet Kandil të Irakut verior.
Turqia pushton rajonet kufitare në veri të Sirisë në bashkëpunim me grupet rebele. / /a.i/
