Ka gjithmonë një herë të parë. Shqipëria ka arritur të triumfojë me rezultatin 1-0 në “Mikheil Meskhi Stadium” përballë Gjeorgjisë me golin e shënuar nga Kristjan Asllani në minutën e 48-të. Kjo është fitorja e parë në historinë e kuqezinjve në transfertën gjeorgjiane.
Një ndeshje që nisi me ritëm, me raste shënimi për të dyja skuadrat. Laçi dha shkëndijën e parë që në nisje, ndërsa vendasit ishin më pranë golit pas pesë minutash lojë me Zivzivadze. Ismajli e Tuci nga njëra anë dhe Davitashvili e Kvaratskhelia nga ana tjetër, vendosën emrin në listën e rasteve të humbura për një pjesë të parë që u mbyll në barazim 0-0.
Fillimi i pjesës së dytë solli dhe momentin vendimtarë të kësaj sfide, që dhuroi dhe tri pikët për kuqezinjtë. Një asistim i Bajramit i dha mundësinë Asllanit që të godasë saktësisht në portën e mbrojtur nga Mamardashvili.
Pavarësisht presionit të gjeorgjianëve, Bajrami, Daku apo dhe Seferi kishin mundësi për të dyfishuar shifrat. Megjithatë, mbyllet 1-0 për kuqezinjtë, që rrëmbejnë tri pikë të arta përballë një kundërshtari që kishte triumfuar në “Air Albania”.
GJEORGJI-SHQIPËRI 0-1
Shënues: Asllani 48’
Është mbyllur sfida në “Mikheil Meskhi Stadium”, me Shqipërinë që ka fituar me rezultatin 1-0 përballë Gjeorgjisë, gol i shënuar nga Kristjan Asllani.
79’ – Seferi ka një mundësi të mirë për të rrezikuar portën gjeorgjiane, por goditja e tij është neutralizuar.
71’ – Strakosha dhe Ismajli bllokojnë në dy tentativat e tij gjeorgjianin Mikautadze.
69’ – Një tjetër mundësi e humbur për kuqezinjtë, është Daku, i aktivizuar në vend të Tucit në minutën e 66-të, që ka goditur në mënyrë të gabuar me kokë në zhvillimin e një goditje dënimi.
57’ – Shqipëria pranë golit të dytë, Bajrami humbet një mundësi të artë.
48’ – Gooooooool. Shqipëria kalon në avantazh përballë Gjeorgjisë. Asllani ka shënuar me asistimin e Bajramit.
…nis pjesa e dytë
Mbyllet pjesa e parë…
45’ – Kvara shfaqet rrezikshëm në zonën kuqezi, por në momentin e fundit është ndalur nga Ismajli.
34’ – Asllani dhuron një top për Laçin në zonën gjeorgjiane, por qe nuk arrin ta kontrollojë si duhet.
29’ – Strakosha gabon duke i dhuruar topin kundërshtarit, por Ajeti tregohet i kujdesshëm duke evituar rrezikun.
14’ – Tuci ngjitet në skenë me një gjuajtje në një pozicion të vështirë, por është ndalur nga portieri i gjeorgjianëve.
11’ – Një tjetër mundësi për Gjeorgjinë, Davitashvili ka lëshuar një goditje të bukur, por reagimi i Strakoshës është në nivelin e duhur.
9’- Pas një goditje dënimi për kuqezinjtë, Ismajli shfaqet me një goditje me kokë në një pozicion të prirët, gjuajtja e tij pritet pa problem nga portieri Mamardashvili.
5’ – Gjeorgjia pranë golit, pas një sulmi nga e djathta, Zivzivadze shfaqet në zonën kuqezi, por gjuajtja e tijë shtë jashtë kuadratit.
2’ – Qazim Laçi jep sinjalin e parë me një gjuajtje nga distanca, por pa arritur të gjejë kuadratin e portës.
1′ – Kuqezinjtë shkelmojnë topin e parë
Ka nisur sfida në “Mikheil Meskhi” mes Gjeorgjisë dhe Shqipërisë e vlefshme për ditën e katërt të Ligës së Kombeve.
GJEORGJI-SHQIPËRI
Gjeorgjia: Mamardashvili, Kakabadze, Dvali, Kashia, Lokoshvili, Kiteishvili, Zivzivadze, Davitashvili, Çakvetadze, Kvaratskhelia, Mikautadze. Trajner: Sanjol
Shqipëria: Strakosha, Balliu, Ismajli, Ajeti, Mitaj, Ramadani, Asllani, Laçi, Bajrami, Asani, Tuci. Trajner: Silvinjo
