UASHINGTON, 12 nëntor /ATSH/- Donald Trump pritet të ndërmarrë një sërë veprimesh ekzekutive në ditën e tij të parë si president – për të rritur zbatimin e emigracionit dhe për të kthyer mbrapsht programet e hyrjes ligjore të Bidenit – një përpjekje gjithëpërfshirëse që do të udhëhiqet nga Tom Homan dhe republikanë të vijës së ashpër të emigracionit, sipas Reuters.
“Veprimet ekzekutive do t’u japin oficerëve federalë të emigracionit më shumë liri për të arrestuar njerëz pa rekorde kriminale; për të shtuar trupa në kufirin SHBA-Meksikë dhe për të rifilluar ndërtimin e murit kufitar”, thanë burimet.
Homan, i cili shërbeu si drejtor i Emigracionit dhe Zbatimit të Doganave në SHBA nga 2017-2018 nën udhëheqjen e Trump – do të vendoset në krye të sistemit të emigracionit në SHBA – pas një karriere prej katër dekadash.
Trump gjithashtu pritet t’i japë fund programeve humanitare të presidentit Joe Biden që lejuan qindra mijëra emigrantë të hynin legalisht në SHBA, vitet e fundit.
“Pesidenti Trump mund t’i nxisë emigrantët me status të skaduar – të largohen vullnetarisht”, sipas burimeve.
Veprimet e hershme ekzekutive të Trump do të nisin axhendën e tij të emigracionit, e cila përfshin premtimin për të dëbuar një numër rekord emigrantësh në SHBA – në mënyrë të paligjshme.
Departamenti Amerikan i Sigurisë Kombëtare vlerësoi se kishte 11 milionë emigrantë pa status ligjor në vitin 2022, një shifër që mund të jetë rritur. //a.i/
