UASHINGTON, 16 tetor /ATSH-DPA/- Shtëpia e Bardhë konfirmoi vizitën e presidentit amerikan Joe Biden në Berlin të planifikuar këtë javë.
Deklarata konfirmoi se Biden do të udhëtojë nesër në kryeqytetin gjerman, ku do të takohet me kancelarin gjerman Olaf Scholz dhe presidentin Frank-Walter Steinmeier, ndër të tjera.
Biden fillimisht kishte planifikuar të vizitonte Berlinin, e ndjekur nga Angola, javën e kaluar, por iu desh ta anulonte udhëtimin për shkak të uraganit “Milton” në SHBA.
Zëdhënësja e Shtëpisë së Bardhë, Karine Jean-Pierre, theksoi në deklaratën e saj bashkëpunimin e ngushtë midis Biden dhe Scholz, veçanërisht në mbështetjen për Ukrainën.
Ajo tha se qëllimi i takimit ishte të forconte më tej lidhjen e ngushtë që SHBA-ja dhe Gjermania ndajnë si aleatë dhe miq dhe të koordinojnë prioritetet gjeopolitike, duke përfshirë mbrojtjen e Ukrainës kundër agresionit rus dhe ngjarjeve në Lindjen e Mesme.
Kjo do të jetë vizita e parë dypalëshe e Biden në Gjermani gjatë mandatit të tij në detyrë.
Fillimisht, ai kishte planifikuar të drejtonte një samit në Ukrainë në bazën ajrore amerikane në Ramstein – gjatë vizitës së tij në Gjermani.
Shtëpia e Bardhë nuk ka njoftuar ende nëse samiti i Ukrainës do të zhvillohet në një datë të mëvonshme, por disa takime do të zhvillohen në Berlin të premten përpara se Biden të kthehet në SHBA. //a.i/
