UASHINGTON, 30 tetor /ATSH-DPA/- Shefi i Mbrojtjes i SHBA, Lloyd Austin tha sot se Uashingtoni është gjithnjë e më i shqetësuar për dislokimin e mundshëm të ushtarëve të Koresë së Veriut në luftën e Rusisë kundër Ukrainës.
Austin tha se disa nga mijëra ushtarë të Koresë së Veriut të dërguar në Rusi tashmë ishin afruar më pranë kufirit me Ukrainën dhe se ata kishin veshur uniforma ruse dhe ishin pajisur me armë ruse.
Sekretari i Mbrojtjes tha se Kremlini me sa duket synon të përdorë koreano-veriorët për të mbështetur trupat ruse në rajonin Kursk pranë kufirit me Ukrainën, një zhvillim që ai e quajti “shqetësues”.
SHBA vlerëson se rreth 10,000 ushtarë ishin dërguar nga Koreja e Veriut në Rusi deri më tani.
“Kthimi te një shtet i pafavorshëm si Koreja e Veriut thjesht nënvizon, se në sa telashe ndodhet presidenti rus Vladimir Putin”, tha Austin në një konferencë për shtyp.
“Ne e marrim këtë shumë seriozisht. Ne i bëjmë thirrje Kremlinit të ndryshojë kursin” tha ai.
Inteligjenca e Koresë së Jugut tha më herët se trupat e Koresë së Veriut në Rusi kishin veshur uniforma ruse dhe u ishin dhënë identitete të rreme për të fshehur origjinën e tyre të vërtetë./ /a.i/
