NJU DELHI, 28 tetor /ATSH-DPA/ – Presidenti ukrainas Volodymyr Zelensky i bëri thirrje Indisë që të bëjë më shumë për t’i dhënë fund luftës në vendin e tij, përveçse të thotë se është kundër luftës, në një intervistë me ”Times of India”, të botuar sot.
“Kryeministri Modi mund të ndikojë në përfundimin e luftës në Ukrainë. Kjo është vlera e madhe e tij në çdo konflikt. Kjo është vlera e madhe e Indisë”, tha Zelensky.
I pyetur në lidhje me ofertën e Modit për të ndërmjetësuar, Zelensky tha se “padyshim që kryeministri Modi mund ta bëjë vërtet këtë, por kjo mund të jetë vetëm sipas formatit të Ukrainës”.
”Nuk mund të ketë asnjë neutralitet mes agresorit dhe viktimës. Nuk mund të jesh neutral sepse do të thotë se je në anën e Rusisë”, shtoi ai.
”Modi është lideri i një vendi vërtet të madh nga perspektiva e popullsisë dhe ndikimit ekonomik”, tha ai.
”Bllokimi i ekonomisë ruse, bllokimi i burimeve të lira të energjisë dhe bllokimi i kompleksit mbrojtës dhe industrial të Rusisë do të zvogëlonte kapacitetin e Moskës për të zhvilluar luftë”, theksoi Zelensky.
India mban lidhje të ngushta ekonomike dhe ushtarake me Rusinë dhe nuk e ka dënuar pushtimin rus të Ukrainës./ a.jor.
