MINSK, 31 tetor /ATSH-DPA/- Lideri bjellorus Alexander Lukashenko tha se lufta e Rusisë kundër Ukrainës mund të përfundojë në një “barazim”, duke e krahasuar konfliktin me një ndeshje futbolli, njoftoi sot agjencia shtetërore e lajmeve “Belta”.
“Ukraina nuk do të fitojë në fushën e betejës. Ukrainasit dhe Perëndimi e kuptojnë këtë. Kështu që ju duhet të lëvizni, duhet të bini dakord”, tha Lukashenko në një konferencë për sigurinë në Minsk.
Lukashenko, një aleat i Kremlinit, nuk elaboroi se si mund të arrihet një rezolutë e tillë, por iu referua negociatave ruso-ukrainase që u zhvilluan menjëherë pas fillimit të luftës në 2022.
Moska i ka portretizuar bisedimet e vitit 2022 sikur marrëveshja pothuajse ishte arritur, duke sugjeruar se Ukraina kishte pranuar një status neutral.
Megjithatë, kjo do të kishte kufizuar aftësitë mbrojtëse të Ukrainës kundër Rusisë dhe çështja e territoreve të pushtuara nga Rusia mbeti e pazgjidhur.
Ministri i Jashtëm rus Sergei Lavrov i bëri jehonë gjuhës së Lukashenkos, por deklaroi se një kompromis ishte i papranueshëm.
“Një barazim nuk do të mbronte në mënyrë adekuate interesat e të gjitha palëve të përfshira”, tha ai në Minsk.
Rusia aneksoi ilegalisht Gadishullin e Krimesë në vitin 2014. Pas pushtimit të saj në shkallë të plotë të Ukrainës në shkurt 2022, ajo ka pretenduar kontroll të mëtejshëm mbi katër rajone të tjera në Ukrainën juglindore.
Me përparimet e vazhdueshme të forcave ruse, Moska tha se mund të arrijë objektivat e saj, të cilat kërkojnë që Ukraina të heqë dorë nga pretendimet për këto katër zona, të braktisë kërkesën e saj për anëtarësim në NATO dhe t’i nënshtrohet “denazifikimit”.
Termi i përdorur nga Moska duket se nënkupton krijimin e një qeverie në Kiev – më të përafruar me interesat ruse.
Kievi është zotuar të rimarrë të gjithë territorin e pushtuar nga Rusia, përfshirë Krimenë./ /a.i/
