Lajme tronditëse vijnë nga Spanja, ku bëhet e ditur se situata e dëmtimeve të vazhdueshme të David Alaba, mund të shtyjë futbollistin austriak që të mbyllë karrierën që në moshën 31-vjeçare.
Futbollisti i Real Madrid pësoi një këputje të ligamenteve të gjurit dhe iu nënshtrua ndërhyrjeve kirurgjikale. Ai pritej që të kthehej në muajin nëntor në fushat e lojës, por sipas “Onda Cero”, kthimi i tij nuk duket i afërt.
Media spanjolle raporton se lojtari ndjen dhimbje sa herë vë këmbën në tokë me intensitet, pasi për shkak të dëmtimeve të njëpasnjëshme, struktura e tij e ligamenteve të gjurit është holluar dhe ka fërkim të kockave. Mjekët e klubit dhe specialistët po mundohen të gjejnë një zgjidhje, por e ardhmja e tij në futbollin profesionist në nivelet më të larta duket e zymtë.
Raportohet se tashmë afati i ri për kthimin e Alaba në fushë është parashikuar si janari i vitit 2025, gjithmonë nëse gjendet një zgjidhje për këtë problem jo të vogël.
PANORAMASPORT.AL
