Policia sllovene ngriti kallëzim penal kundër kryeministrit Robert Golob për “ndërhyrje në punët e policisë”.
Raporti, i dorëzuar në Prokurorinë e Specializuar të Shtetit, bazohet në pretendimet e ish-ministres së Brendshme Tatjana Bobnar dhe ish-drejtorit të Policisë në detyrë Boshtjan Lindav për presionin e papërshtatshëm politik që Golob dyshohet se ka ushtruar ndaj Ministrisë së Brendshme dhe Policisë.
Megjithëse natyra e saktë e veprës penale të përmendur në ankesë nuk është bërë publike, Golob akuzohet se ka kryer një “krim korrupsioni”, raporton gazeta sllovene N1.
Golob i hodhi poshtë akuzat duke i cilësuar si “të çuditshme” dhe shprehu habinë që policia kishte bërë kallëzim ndaj tij.
“Në realitet nuk bëhet fjalë për ndërhyrje në punën e policisë, por për luftën politike që Tatjana Bobnar ka drejtuar që prej dorëheqjes së saj dy vite më parë”, tha Golob.
“Kjo ka të bëjë me fjalën time kundër fjalës së dy politikanëve dhe më duket vërtet e çuditshme që sot po flasim për një raport policor për shkak të kësaj”, shtoi ai.
“Edhe unë besoj në shtetin e së drejtës dhe për këtë arsye do t’i përgjigjem të gjitha akuzave dhe do t’i hedh poshtë me mjete ligjore”.
Bobnar, e cila aktualisht punon si këshilltare e presidentit slloven, dha dorëheqjen si ministre e Brendshme në dhjetor 2022 mes një konflikti në të cilin ajo akuzoi Golobin se ushtronte presion politik ndaj saj për të ndikuar në vendimet e personelit në forcën policore, pasi ai refuzoi të zgjaste mandatin e Lindavit si shef policie.
Kallëzimet penale janë rezultat i një hetimi policor dyvjeçar bazuar në pretendimet e Bobnar. Zyra e specializuar e Avokatit të Shtetit ka tani mundësinë për të ngritur një aktakuzë të drejtpërdrejtë, për të nisur një hetim për të mbledhur prova shtesë ose për të hedhur poshtë raportin. /tesheshi.com/
