Një fitore më shumë se fitore në kuadër të të Kupës Kreispokal në Gjermani.
Një kualifikim më shumë se kualifikim për skuadrën e Kosovës së Dusseldorfit.
Fitore e kualifikim më peshë të madhe e djelmoshave kuqezi, të cilët e gjunjëzuan skuadrën serbe KSC Tesla, me rezultat 2:0.
Atmosfera në Dusseldorf
Mbi 2 mijë shikues festuan këtë fitore e kualifikim të madh sepse ishte më shumë se fitore ndaj një rivalit siç ishte skuadra serbe.
Fitore që u festu me daulle e këngë, për faktin se rrëzuan skuadrën serbe.
“Në një atmosferë të jashtëzakonshme, përpara mbi 2000 shikuesve, FC Kosova Düsseldorf arriti një fitore historike dhe madhështore ndaj ekipit serb KSC Tesla, duke triumfuar me rezultat 0:2.
Ky duel nuk ishte vetëm një ndeshje futbolli, por një përballje e mbushur me emocione dhe ndjenja patriotike, ku çdo aksion në fushë simbolizonte krenarinë dhe unitetin e komunitetit shqiptar në mërgim.
Që nga fillimi i ndeshjes, skuadra jonë tregoi vendosmëri dhe përkushtim maksimal. Nën presionin e mbështetjes së zjarrtë të tifozëve tanë, të cilët ishin të palodhshëm në përkrahjen e tyre, FC Kosova Düsseldorf u vu në avantazh që në minutën e 9-të, kur një autogol i kundërshtarëve na dha epërsinë e merituar. Ky moment ishte një sinjal i qartë se loja do të ishte në kontrollin tonë.
Megjithëse kundërshtarët u përpoqën të riktheheshin në lojë, forca dhe uniteti i ekipit tonë ishin të pakapërcyeshme. Në minutat e fundit të ndeshjes, kur gjithçka dukej e vendosur, heroi ynë Shkelqim Hyseni vulosi fitoren me një gol të jashtëzakonshëm në minutën e 90’ +9, duke mbyllur kështu një përballje të mbushur me emocione dhe krenari.
Një falënderim i madh shkon për tifozët tanë të mrekullueshëm, të cilët nuk ndaluan së përkrahuri ekipin që nga fillimi deri në fund. Zëri i tyre, energjia dhe dashuria për klubin ishin faktori kyç që e udhëhoqi ekipin tonë drejt fitores. Me një mbështetje të tillë, çdo betejë në fushë është e fituar, dhe çdo triumf na bën më të fortë dhe më të bashkuar.
Kjo fitore ndaj KSC Tesla është dëshmi e forcës, vendosmërisë dhe krenarisë së FC Kosova Düsseldorf.
Së bashku, me një ekip të pathyeshëm dhe një komunitet të pandalshëm, ne do të vazhdojmë të shkruajmë historinë tonë të lavdishme!”, ka njoftuar FC Kosova.
