Ambasadori i Shteteve të Bashkuara të Amerikës, Jeffrey Hovenier ka vlerësuar interesimin e popullit të Kosovës për zgjedhjet presidenciale në Amerikë, duke e parë si të rëndësishme mundësinë për të folur me të rinjt këtu për procesin që po ndodh atje.
Ambasadori Hovenier tha se ShBA-ja është demokraci e pjekur dhe se institucionet e saj janë solide, ndërsa shtoi se sido që të jetë rezultati, qeveria amerikane do të vazhdojë të përfaqësojë popullin amerikan.
Ai ka thënë se zgjedhjet janë gjithmonë një mënyrë për të festuar, ngaqë sipas tij, ato janë një akt esencial në demokraci.
“Zgjedhjet janë gjithmonë një mënyrë për të festuar sepse janë një akt esencial në demokraci, ku qytetarët mund të shprehin vullnetin e tyre për të bërë zgjidhje për vendin e tyre. Unë kam disa mesazhe që mendoj se janë të rëndësishme për t’i ndarë. Një, ne e kemi çmuar aq shumë interesimin e popullit të Kosovës për zgjedhjet tona dhe mendoj se kjo fushatë dhe këto zgjedhje kanë treguar sërish se sa e gjallë, sa e pasur, sa amerikanët aktivë kanë të bëjnë me përgjegjësinë e tyre qytetare, dhe me të vërtetë përfshihen në këtë pyetje se çfarë drejtimi duhet të marrim dhe kush duhet ta udhëheqë vendin tonë. Është vërtetë e rëndësishme dhe ne jemi të lumtur që kemi këtë mundësi për të folur me të rinjtë kosovarë por edhe me kosovarët e të gjitha shtresave për procesin tonë”, ka thënë Hovenier.
“Gjëja tjetër që do të thoja është se Shtetet e Bashkuara të Amerikës janë një demokraci shumë e pjekur. Ne e kemi bërë këtë për më shumë se 200 vjet. Institucionet tona janë solide. Nuk e di rezultatin e këtyre zgjedhjeve, por e di se cilido që të dalë, populli amerikan do të vazhdojë dhe institucionet amerikane të qeverisë do të vazhdojnë të përfaqësojnë popullin e Shteteve të Bashkuara”, ka thënë Hovenier për Kanal10.
Për zgjedhjet në Amerikë, foli sot edhe Presidentja e Kosovës, Vjosa Osmani, e cila tha se Kosova gjithmonë ka pasur mbështetjen si të republikanëve, e poashtu edhe të demokratëve.
Sipas saj, cilido që zgjidhet president, mes Kamala Harris dhe Donald Trump, bashkëpunimi me ShBA-në do të vazhdojë, pasi mbeten aleati më i rëndësishëm strategjik për Kosovën.
Të martën e 5 nëntorit në ShBA po votohet për zgjedhjet presidenciale.
Në listë janë dy kandidatë, republikani Donald Trump, ish-president, dhe demokratja Kamala Harris, nënpresidente aktuale.
Fraza e fushtës së Harris është “Ne nuk do të kthehemi prapa”, duke iu referuar politikave të ish-presidentit Donald Trump. Ajo mbështet të drejtat e abortit, ka nisur një plan ekonomik për të ndaluar rritjen e çmimeve në dyqanet ushqimore dhe thotë se do t’i japë fund mungesës së strehimit në Amerikë.
Në anën tjetër, Donald Trump thotë se do të “vulos kufirin” për të ndalur emigrantët e paligjshëm, ka premtuar ulje taksash të përgjithshme, ka propozuar një tarifë prej 10% për të gjitha importet amerikane dhe është zotuar për të ulur çmimet e energjisë.
