TEHERAN, 26 tetor /ATSH-DPA/- Pas sulmeve izraelite në Iran dhe mbylljes së hapësirës ajrore iraniane, aviacioni civil do të rifillojë si normalisht, tha sot autoriteti i aviacionit.
“Linjat ajrore mund të kthehen në operimet normale nga ora 9:00 e mëngjesit, megjithëse pasagjerët këshillohen të kontaktojnë linjat e tyre ajrore”, njoftoi agjencia shtetërore e lajmeve IRNA.
Sulmi izraelit ndaj instalimeve ushtarake pritej për ditë të tëra, pasi Korpusi i Gardës Revolucionare Islamike iraniane lëshoi rreth 200 raketa balistike në Izrael më 1 tetor.
Irani tregoi se do të hakmerrej, por nuk tha se si dhe kur.
“Nuk ka dyshim se Izraeli do të marrë një përgjigje të përshtatshme për çdo veprim”, tha agjencia e lajmeve Tasnim – duke cituar një burim anonim nga qeveria.
Tasnim konsiderohet si zëdhënësi i Korpusit të Gardës Revolucionare Islamike (IRGC), forca elitare ushtarake e Iranit.
Zëdhënësi i IDF-së Hagari paralajmëroi Iranin, pas përfundimit të sulmit – për rrezikun e përshkallëzimit të mëtejshëm.
“Nëse regjimi në Iran gabon duke nisur një raund të ri përshkallëzimi, ne jemi të detyruar të përgjigjemi”, tha ai.
SHBA i kishte kërkuar Izraelit, si aleati i tij më i rëndësishëm, të mos sulmonte objektet bërthamore ose fushat e naftës në Iran. Mediet iraniane fillimisht raportuan për “dëm të kufizuar” në bazat ushtarake në vend. Deri më tani nuk ka raportime për viktima të mundshme.
Hapësira ajrore iraniane nuk u mbyll menjëherë, por ajo u mbyll menjëherë pas fillimit të sulmit dhe më vonë u rihap pasi Izraeli përfundoi operacionin e tij.
Mediet shtetërore iraniane raportuan shpërthime në afërsi të kryeqytetit, Teheranit, ku jetojnë 15 deri në 20 milionë banorë. Herët në mëngjes, shpërthime u dëgjuan edhe në qendër të qytetit, dhe zjarri kundërajror ishte i dukshëm.
Fillimisht nuk ka pasur asnjë informacion zyrtar nga asnjëra palë për viktima apo dëme.
Sulmet e Izraelit ndaj objektivave iraniane shihen si hakmarrje për sulmin e 1 tetorit të Iranit ndaj Izraelit, në të cilin ai lëshoi rreth 200 raketa balistike kundër shtetit hebre. //a.i/