BAGDAD, 22 tetor /ATSH-ANSA/ – Forcat e sigurisë në Irak kanë vrarë liderin e grupit terrorist të Shtetit Islamik (IS) në vend, deklaroi kryeministri irakian Mohammed Shia al-Sudani.
”Përveç liderit të Shtetit Islamik në Irak, tetë figura të tjera të larta të grupit u vranë gjatë një operacioni heroik në malet Hamrin. Nuk ka vend për terroristët në Irak”, theksoi al-Sudani.
Sipas forcave të armatosura të Irakut, lideri i vdekur i Shtetit Islamik është Jasim al-Masroui Abu Abdel Qadir.
Forcat e sigurisë gjatë operacionit zbuluan sasi të mëdha armësh, municionesh dhe pajisje të tjera, si dhe ambiente për prodhimin e mjeteve shpërthyese.
Shteti Islamik, i cili bëri thirrje për një version fondamentalist të sundimit islamik, dikur kontrollonte rreth 40% të Irakut dhe rreth një të tretën e Sirisë fqinje.
Një aleancë ushtarake e udhëhequr nga SHBA ka filluar të luftojë grupin, i cili tani konsiderohet i mundur ushtarakisht.
Sipas Komandës Qendrore të SHBA-së, aktualisht janë rreth 2 500 luftëtarë në të dy vendet që vazhdojnë të kryejnë sulme.
Organizata e Projektit Kundër Ekstremizmit numëroi rreth 70 sulme vetëm në Siri në mars të këtij viti. Qelizat e Shtetit Islamik rimorën gjithashtu një pjesë të fuqisë së tyre në pjesë të Afrikës dhe Azisë Jugore./ /os/
