PARIS, 3 tetor /ATSH-DPA/ – Agjencia Ndërkombëtare e Energjisë (IEA) ka paralajmëruar se rritja e konsumit global të gazit dhe tensionet gjeopolitike mund të komplikojnë furnizimet, ndërsa vendet i afrohen dimrit.
Sipas raportit të fundit të agjencisë, kërkesa industriale, veçanërisht nga Azia, po nxit një rritje të konsiderueshme të përdorimit të gazit.
Agjencia parashikoi se kërkesa globale për gaz do të rritet me më shumë se 2,5% këtë vit, duke arritur një rekord prej 4200 miliardë metra kub, me një rritje të mëtejshme prej 2,3% deri në vitin 2025.
”Një nga pasiguritë kryesore me afrimin e dimrit evropian ishte tranziti i gazit rus përmes Ukrainës”, tha IEA.
”Kontratat aktuale skadonin në fund të vitit 2024, gjë që potencialisht mund të ndërpresë të gjitha furnizimet e gazit rus në Evropë përmes kësaj rruge”, tha IEA, duke shtuar se Evropa do të duhet të rrisë importet e saj të gazit natyror të lëngshëm (LNG) në vitin e ardhshëm.
Kjo do të ushtrojë presion të mëtejshëm mbi furnizimet globale, pasi LNG është thelbësor për ruajtjen e ekuilibrit midis ofertës dhe kërkesës.
IEA tha se ndërsa pengesat në Kanalin e Panamasë dhe Detin e Kuq po preknin transportin detar, ato ende nuk kishin çuar në një rënie të furnizimit me LNG.
Megjithatë, këto çështje ekspozojnë dobësitë në tregtimin e LNG brenda një tregu global të gazit gjithnjë e më të ndërlidhur./ /os/
