BERLIN, 14 tetor /ATSH/- Zgjerimi i Bashkimit Evropian është tani një prioritet kryesor, veçanërisht për gjashtë vendet e Ballkanit Perëndimor që synojnë t’i bashkohen bllokut, tha sot presidentja e Komisionit Evropian, Ursula Von Der Leyen, sipas “a News”.
“Sot, ndryshe nga 10 vjet më parë, zgjerimi është në krye të axhendës sonë. Kur shikojmë drejt së ardhmes, ne e parashikojmë atë me të gjashtë partnerët e Ballkanit Perëndimor si pjesë e Bashkimit Evropian” tha Von der Leyen.
Ajo u kërkoi vendeve të Ballkanit Perëndimor të ndjekin shembullin e zgjerimit të BE-së në vitin 2004, duke theksuar se reformat dhe forcimi i bashkëpunimit rajonal ishin thelbësore për t’i sjellë këto vende më pranë anëtarësimit.
“Për ta arritur këtë, ne duhet të mësojmë nga zgjerimi i 2004. Kërkesa e parë është përafrimi me vlerat thelbësore evropiane, duke përfshirë respektimin për demokracinë dhe ligjin e së drejtës. E dyta është integrimi i hershëm ekonomik”, tha ajo.
Von der Leyen përshëndeti gjithashtu zhvillimet e fundit mbi përfaqësimin e Kosovës në Marrëveshjen e Tregtisë së Lirë të Evropës Qendrore (CEFTA), duke vënë në dukje se vendimi për të lejuar që Kosova të përfaqësohej nga zyrtarët e saj dhe jo nga Misioni i OKB-së në Kosovë (UNMIK), ishte një hap pozitiv.
Përveç kësaj, ajo përgëzoi qeverinë e Kosovës për heqjen e ndalimit të importit të mallrave serbe, një veprim që BE e sheh si nxitje të marrëdhënieve më të mira midis dy kombeve.
“I përgëzoj të dyja palët për demonstrimin e vullnetit politik”, shtoi ajo.
Marrëveshja CEFTA, e nënshkruar në vitin 2006 nga vendet e Ballkanit dhe UNMIK-u në përputhje me Rezolutën 1244 të Këshillit të Sigurimit të OKB-së, lehtëson një zonë të tregtisë së lirë midis vendeve të Ballkanit Perëndimor. Ai konsiderohet si një komponent kyç në rrugën e rajonit drejt integrimit evropian.
“Kjo është një shenjë e rëndësishme drejt normalizimit të marrëdhënieve”, tha ajo, duke nënvizuar përpjekjet e Bashkimit Evropian për të integruar ekonomitë e Ballkanit në tregun e përbashkët të BE-së.
“Ne kishim nevojë për një urë lidhëse midis tregut të përbashkët rajonal dhe tregut të përbashkët evropian. Kjo urë është plani ynë i rritjes për Ballkanin Perëndimor, i cili përfshin 6 miliardë euro investime”, theksoi Von der Leyen.
Ajo nënvizoi gjithashtu progresin e bërë nga rajoni, duke vënë në dukje se pesë nga gjashtë axhendat e reformave do të miratoheshin këtë javë, duke zhbllokuar fondet nga plani i rritjes.
“Kjo do të thotë që pagesat nga plani 6 miliardë euro (6,5 miliardë dollarë) mund të fillojnë të shpërndahen para fundit të vitit”, tha Von der Leyen.
Kancelari gjerman Olaf Scholz, i cili gjithashtu foli për këtë çështje, theksoi rëndësinë e përpjekjeve të vazhdueshme për normalizimin e marrëdhenieve ndërmjet Serbisë dhe Kosovës, duke u kërkuar të dyja vendeve që të zgjidhnin çështjet e tyre dypalëshe përmes bashkëpunimit. //a.i/
