BERLIN, 18 tetor /ATSH-DPA/- Presidenti i SHBA-së, Joe Biden e quajti Gjermaninë aleaten më të afërt dhe më të rëndësishme të vendit të tij, ndërsa ai vizitoi Berlinin për bisedime me liderët evropianë.
Bisedimet mes kancelarit gjerman Olaf Scholz, presidentit francez, Emmanuel Macron dhe kryeministrit britanik, Keir Starmer pritet të fokusohen në çështjet e politikës së jashtme, duke përfshirë pushtimin e vazhdueshëm të Rusisë në Ukrainë dhe konfliktin në Lindjen e Mesme.
Përpara bisedimeve, presidenti amerikan Joe Biden vlerësoi kancelarin gjerman, Scholz për mbështetjen e Ukrainës në luftën e saj kundër Rusisë, duke thënë se Berlini “u ngrit për të bërë atë që duhej duke pasur parasysh rrethanat e pushtimit në shkallë të plotë të Moskës”.
“Ju treguat mençurinë për të kuptuar se kjo luftë po shënonte një pikë kthese në histori”, tha Biden.
“SHBA-ja dhe Gjermania janë dy mbështetësit më të mëdhenj të Ukrainës në luftën e saj për mbijetesë si një komb i lirë dhe i pavarur”, shtoi ai.
Scholz, nga ana tjetër, vlerësoi udhëheqjen e Biden për bashkimin e aleancës së NATO-s dhe forcimin e mbështetjes për Ukrainën – në momentet kritike rreth nisjes së pushtimit në shkallë të plotë në shkurt 2022.
“Gjermania do të “qëndrojë në krah të Ukrainës për aq kohë sa të jetë e nevojshme”, tha Scholz.
“Ukraina do të ketë nevojë për mbështetje të mëtejshme përpara dimrit të tretë të luftës, dhe ndërsa kostoja ka të ngjarë të jetë e rëndësishme për aleatët perëndimorë, ajo po zbehet në krahasim me koston e jetesës në një botë ku mbizotëron agresioni, ku shtetet e mëdha sulmojnë më të vegjlit thjesht sepse munden”, tha Biden.
Biden përshëndeti më tej mbështetjen e Gjermanisë për Izraelin që nga sulmet e 7 tetorit.
“Vrasja e Yehya al-Sinwar, liderit të lëvizjes islamike palestineze Hamas, ishte një moment drejtësie”, tha Biden.
“Ai kishte gjakun e amerikanëve, izraelitëve, palestinezëve dhe gjermanëve dhe shumë të tjerëve në duart e tij”, shtoi presidenti amerikan. / /a.i/
