BEJRUT, 24 tetor /ATSH-DPA/- Gjermania ka premtuar 60 milionë euro shtesë në ndihmë humanitare për Libanin, pasi ministrja e Jashtme Annalena Baerbock paralajmëroi se konflikti midis Izraelit dhe Hezbollahut mund të çojë në “destabilizimin e plotë” të vendit.
“Kancelarja gjermane Olaf Scholz njoftoi mbështetjen dje gjatë një bisede telefonike me kryeministrin e përkohshëm libanez Najib Mikati”, sipas zëdhënësit të qeverisë Steffen Hebestreit.
Baerbock vizitoi dje Bejrutin, duke paralajmëruar për pasoja të rrezikshme për Lindjen e Mesme më të gjerë nëse konflikti midis Izraelit dhe milicisë Hezbollah të mbështetur nga Irani përshkallëzohej më tej.
“Një destabilizim i plotë i vendit do të ishte fatal për shoqërinë e larmishme fetare në Lindjen e Mesme, dhe gjithashtu për të gjithë rajonin”, tha Baerbock në kryeqytetin libanez përpara bisedimeve me politikanët libanezë dhe organizatat e ndihmës.
Vizita, e cila nuk u njoftua më parë për arsye sigurie, është e katërta e Baerbock në Liban që nga sulmet e 7 tetorit nga grupi militant palestinez Hamas kundër Izraelit.
Megjithatë, kjo është vizita e saj e parë – që kur Izraeli përshkallëzoi konfliktin e tij me Hezbollahun në shtator, duke nisur një ofensivë tokësore në Libanin jugor dhe një valë sulmesh ajrore në Bejrut – të konsideruara si luftimet më të rëndësishme në vend që nga lufta e vitit 2006. //a.i/
