Barcelona ka fituar ndeshjen e fundit te raundit të tretë në Euroligë 86:71 përballë Monacos duke u ngjitur tashmë në vendin e dytë, me francezët që zbresin në vendin e pestë.
Ndeshja ishte e ekuilibruar në pjesën e parë por me skuadrën spanjolle, e cila ishte më agresive dhe fizike.
Trepikëshat e katalanasve bënë që të shkëputeshin dy herë në pjesën e parë por sërish francezët mundën të barazonin. Në fund të periodës së dytë vjen dhe shthurja e Monacos me disa gabime që i dhanë Barcelonës 8 pikë avantazh.
Në pjesën e dytë Monaco përpiqet por Mike James, ylli i skuadrës së Principatës nuk ishte në ditë të mirë duke e mbyllur me vetëm 13 pikë. Për Barcelonën shkëlqeu Kevin Punter me 21 pikë dhe kosha vendimtarë edhe në fundin e ndeshjes.
Në periodën e katërt skuadra spanjolle kaloi deri në 20 pikë avantazh, por më tej frenoi . Monaco nuk mundi dot ta ulte më shumë se 13 pikë e më tej sërish Barcelona e rriti diferencën deri në 19 pikë.
Tre minutat e fundit ishin me një nervozizëm të madh teksa disa herë gjyqtarët kërkuan të konsultoheshin me moviolën në fushë dhe kjo i irritoi tifozët spanjollë. Në fund nuk ka surpriza, Barcelona mundi ta fitonte këtë sfidë e tashme do të udhëtojë drejt Beogradit ku do të luajë përballë Cërvena Zvezda që nuk njeh humbje pas 3 javësh.
