VJENË, 24 tetor /ATSH-DPA/ – Kompania ”Coca-Cola” po tërheq 28 milionë shishe plastike gjysmë litri në Austri për shkak të rrezikut që mund të përmbajnë copa të vogla metali, pas një aksidenti prodhimi.
”Kjo është tërheqja më e madhe në vend për të paktën 25 vjet”, deklaroi zëdhënësi i Autoritetit të Tregut të Vjenës, Alexander Hengl.
Kompania tha se pijet ”Coca-Cola”, ”Fanta”, ”Sprite” dhe ”MezzoMix” me një datë skadence midis 4 shkurtit 2025 dhe 12 prillit 2025 u prekën nga ky incident.
”Nuk mund të përjashtohet që një numër shumë i vogël i këtyre shisheve mund të përmbajnë copëza të vogla metalike për shkak të një gabimi teknik gjatë prodhimit”, theksoi kompania.
”Coca-Cola” theksoi se jo e gjithë seria e periudhës në fjalë është shitur.
”Shumë shishe mund të jenë ende në ambientet e kompanisë ose në depot e shitjes me pakicë”, tha një zëdhënës.
”Autoriteti i tregut të Vjenës dhe 80 inspektorët e tij tashmë po monitorojnë nëse shitësit me pakicë po heqin shishet nga raftet”, tha Hengl.
Tërheqja e këtij prodhimi do të përfundojë brenda pak javësh./ /os/
