Donald Trump i dërgoi fshehurazi teste për të zbuluar Covid-19 homologut të tij rus Vladimir Putin kur ai ishte në Shtëpinë e Bardhë në mes të pandemisë dhe ndërkohë që kishte mungesë në SHBA, zbulon një libër i ri nga Bob Woodward, një legjendë e gazetarisë amerikane.
Woodward, i cili ka mbuluar Shtëpinë e Bardhë për gjysmë shekulli për Washington Post, zbuloi skandalin Watergate me Carl Bernstein që çoi në dorëheqjen e Presidentit Richard Nixon në 1974. Në librin e tij të ri, të titulluar “Lufta” dhe që do të publikohet më 15 tetor, shkruan gjithashtu se Trump mbante një marrëdhënie personale me Putinin, pavarësisht pushtimit rus të Ukrainës, ndërkohë që aspiron të kthehet në Uashington si President për herë të dytë.
Sipas mediave amerikane që kanë akses në librin, Vladimir Putin ka pranuar testet për zbulimin e koronavirusit dhe i është betuar Donald Trump që të mos i thotë asgjë: “Dua që të mos i tregosh askujt. Njerëzit do të zemërohen me ty, jo me mua”, thuhet se i tha në atë kohë.
Një këshilltar që foli në kushte anonimiteti pohoi se Donald Trump foli fshehurazi me Putinin deri në shtatë herë pasi ai u largua nga Shtëpia e Bardhë në vitin 2021. Në fillim të vitit 2024 ai kërkoi një ndihmës të dilte nga zyra e tij në rezidencën në Mar-a-Lago, Florida, për të folur me telefon me presidentin rus.
“Asnjë nga këto histori të krijuara nga Bob Woodward nuk është e vërtetë; ato janë sajesa të një njeriu vërtet të çmendur dhe të çekuilibruar,” kundërshtoi Steven Cheung, një zëdhënës i Trump, duke shtuar se libri “mund të përdoret në vend të letrës higjienike”.
Kamala Harris, kundërshtarja e Trump në zgjedhjet presidenciale të 5 nëntorit, shprehu zemërimin e saj. “Të gjithë në Amerikë po garonin për të marrë testet (…) dhe ky po i dërgonte ato në Rusi, te një diktator vrasës. Është vetëm shembulli i fundit se kush është Trump”, komentoi zëvendëspresidentja aktuale e SHBA. /tesheshi.com/
